Тараз. 77news — Қазақ домбырасын әлемге танытуды мақсат еткен «Бастау» тобы Голливудта өтетін әлемдік шоуға қатысуға жолдама жеңіп алды. Бұл туралы топтың продюсері Алпамыс Шәрімов Instagram парақшасында жария етті, — деп хабарлайды 77 news.kz ақпарат агентігі.

Мәлім болғандай, 4 наурыз күні Латвия астанасы Ригада «Восходящие звезды» xалықаралық байқауы өтті. Онда «Бастау» домбырашылар тобының мүшелері — Қазақ ұлттық өнер университетінің студенттері Темірлан Олжабай мен Ернат Наурыз өзге музыкалық аспаптарды артта қалдырып, бас жүлдені жеңіп алды.

«Негізі бұл классикалық музыкалық аспаптар байқауы еді. Алайда, біз қазақтың ұлттық музыка аспабы — домбыраны қатыстыруға өтініш білдірдік. Өтінішіміз қабыл болды, біз күтпеген едік», — деді продюсер.

Алпамыс Шәрімовтің айтуынша, домбырашылар байқауда «Күй тартыс» және «Евразия» күйлерін орындаған. Қорытындысында, қазақстандық музыканттар Голливудта өтетін үлкен әлемдік шоуға қатысу мүмкіндігіне ие болды.

«Қазақ ұлттық өнер университетінің ректоры Айман Қожабекқызы Мұсақожаеваға алғыс айтқымыз келеді. Қазақ өнерінің дамуы үшін әрқашан қолдау көрсетіп отырады. Топтың осы байқауға қатысуына барлық жол шығындарын өз мойнына алды»,- деп атап өтті Шәрімов.

«Восходящие звезды — 2018» музыкалық аспаптар мен вокалистер конкурсы 26 ақпан — 4 наурыз күндері аралығында Латвия астанасы Рига қаласында өтті. Байқауға 30 жасқа дейінгі жастар және балалар қатысты.

Айта кетейік, «Бастау» тобы 2017 жылы құрылып, әнші Димаш Құдайбергеннің Астана қаласында өткен «Бастау» концертінде тұсауы кесілген болатын.

Біздің жаңалықтарымызды Telegram парақшасынан оқи аласыздар! Жазылыңыздар!