Жаңа жылдан бастап жамбылдық 100 мыңнан  астам қызметкердің айлығы 1,5 есеге өсті. Бұл аймақтағы барлығы 345 мың  жұмысшының 34 пайызын құрайды, деп хабарлайды 77news.kz ақпарат агенттігінің тілшісі ҚазАқпаратқа сілтеме жасап.

Өңірдегі бюджеттік мекемелерде еңбек ететін 40 мыңдай  жұмысшының жалақысы орташа есеппен 35 пайызға көтерілді. Ал, ең төменгі айлық Жолдауда жүктелген межеге сәйкес 42 500 теңгеге өсті.  Сондай-ақ, атаулы әлеуметтік жәрдемақылар 2 есеге дейін ұлғаймақ.

«23 кәсіпорын жұмыскерлерінің айлығын көтеріп отыр. Нәтижесінде бүгінгі күні облыс көлемінде жеке 1 609 кәсіпорында 20 900 жұмысшыға 42 500 теңге жалақы төлейтінін растады. 28 мыңнан 42 500-ге көтерілді», — дейді облыстық еңбек инспекциясы басқармасының басшысы Серғали Айдапкелов.

Айта кетейік, жаңа жылдан бастап еліміз бойынша 2 миллион жұмысшының айлық жалақысы көтерілген. Ол Қазақстан аумағында еңбек ететін азаматтардың үштен біріне тең.